शुक्रवार, दिनांक २४ जानेवारी २०२० रोजी सकाळी नऊ वाजून ५३ मिनिटांनी शनिमहाराज मकरेत प्रवेश करत आहेत. त्यामुळे त्या वेळेपासून वृश्चिकेची साडेसाती संपून कुंभेची साडेसाती सुरू होते आहे. अशा रीतीने आता धनू, मकर आणि कुंभ या तीन राशींना साडेसाती सुरू असणार आहे. त्या निमित्ताने, पालघरचे ज्योतिष मार्गदर्शक सचिन मधुकर परांजपे यांनी दिलेली माहिती आणि सुचवलेल्या उपासना... 
..........
उपासनेविषयी बोलण्याआधी शनी या दैवताविषयी एक गोष्ट लक्षात घ्या. शनी हे दैवत उग्र, क्रूर, न्यायनिष्ठुर, स्पष्ट, मितभाषी, कृतिजन्य व श्रेष्ठ आहे. किरकोळ उपाय-उपासना केल्या म्हणजे त्याच्या पीडांची तीव्रता कमी होईल असा गैरसमज चुकूनही बाळगू नका. त्याच्या उपाय-उपासनेत कर्मप्रधानतेला अधिक महत्त्व आहे. साडेसातीतली तुमची वागणूक ही जितकी श्रद्धायुक्त, विनयी (Down to earth), निर्व्यसनी, नैतिक असेल तितक्या प्रमाणात ते उपाय लाभदायक ठरतात. एकीकडे अयोग्य वर्तन करून दुसरीकडे शनिमहाराजांसमोर नाक घासून तेलाचा अभिषेक कराल आणि पीडानिवारणाची अपेक्षा बाळगाल, तर ते सर्वत: चूक ठरेल हे विसरू नका... काही महत्त्वाच्या उपाय-उपासना पुढीलप्र्माणे आहेत. त्यापैकी ज्या जमतील-रुचतील त्या ‘नित्यनेमाने’ आणि श्रद्धेने कराव्यात ही विनंती....

- साडेसाती/अडीचकी सुरू असताना शनिवारी कोणत्याही स्वरूपात/कोणत्याही परिस्थितीत मांसाहार/मद्यपान करू नये. या गोष्टींचा श्रीशनिमहाराजांना तिटकारा आहे. हे बंधन शनिवार सूर्योदयापासून रविवार सूर्योदयापर्यंत पाळावे. रात्री १२नंतर इंग्रजी तारीख बदलते, वार नाही. तो दुसऱ्या दिवशी सूर्योदयालाच बदलतो, ते विसरू नये...

- साडेसातीत एक तर मारुतीची किंवा श्री शनीची उपासना यापैकी एकच काय ती करावी. दोन्ही उपासना एकत्र करू नयेत. मारुतीची उपासना करायची असेल, तर वरील उपायांसोबत रोज सकाळी मारुती स्तोत्राचे वाचन करावे किंवा श्रीहनुमानचालिसा/श्री बजरंगबाण किंवा हनुमान वडवानल स्तोत्र यांचे वाचन करणेही लाभदायक असेल. शनिवारी संध्याकाळी अगरबत्ती लावून मारुतीचे स्मरण करून रामचरितमानसधील श्रीसुंदरकांडाचे वाचन करणेही अति लाभदायक असते.

- श्री शनीचीच उपासना करायची असेल तर रोज सकाळी व संध्याकाळी

(अ) ॥ ॐ नीलांजन समाभासं रविपुत्रं यमाग्रजम ।

या शनिमंत्राचा किमान १०८ वेळा जप करावा किंवा मग...

(ब) ॥ ॐ सूर्यपुत्रो दीर्घदेहो विशालाक्ष शिवप्रिय:

या पीडाहरण मंत्राचा १०८ वेळा जप करावा

(क) शनिवारी संध्याकाळी काळ्या रंगाची घोंगडी किंवा ब्लँकेटवर पश्चिमाभिमुख बसून समोर एक चंदन अगरबत्ती व तिळाच्या तेलाचा दिवा लावून एकाग्रचित्ताने व शांतपणे-सलगतेने ‘श्रीशनिमहात्म्य’ पठण करावे... शनिमहात्म्य वाचन एकदा सुरू केल्यावर ते मध्येच खंडित करू नये. म्हणजे तुम्ही शनिमहात्म्य वाचन करण्यापूर्वी ते दर शनिवारी करता येईलच, याची खातरजमा करून घ्यावी.

- साडेसातीच्या काळात स्त्री-पुरुषांनी व्यभिचार, वेश्यागमन किंवा परस्त्रीगमन आणि एकंदरीत अनैतिक संबंधांपासून कटाक्षाने दूर रहावे. त्या प्रकाराचे दणके शारीरिक, मानसिक आणि प्रामुख्याने सामाजिक पातळीवर जबरदस्त बसतात. हाच नियम भ्रष्टाचारालाही लागू होतो.

- शनीच्या साडेसाती/अडीचकीच्या काळात धनसंपत्तीच्या बाबतीत दीर्घकालीन व सुरक्षित गुंतवणूक करण्यावर अधिकाधिक भर द्यावा. गरजूंना अन्नदान करावे. सेवाभावी संस्थांना सत्पात्री दान करावे..

- सातमुखी, दहामुखी आणि अकरामुखी रुद्राक्ष संस्कारांसह धारण करणे लाभदायक आहे. या रुद्राक्षास मद्यपान न करणे, परस्त्रीगमन न करणे व जुगार न खेळणे ही तीन बंधने कटाक्षाने पाळावीच लागतात. रुद्राक्ष हवे असल्यास अधिक माहितीसाठी कार्यालयीन वेळेत (०९८२३१ २४२४२) या क्रमांकावर संपर्क साधावा.

- शनी हे दैवत स्निग्धताप्रिय दैवत असल्याने इतरांशी वागताना, बोलताना विनय, मृदुता आणि विनम्रपणे वागावे. साडेसातीच्या काळात इतरांचे वाद मिटवणे, जामीन राहणे, गॅरेंटर राहणे असल्या गोष्टीत पडू नये. नसत्या भानगडी मागे लागण्याची शक्यता असते. साडेसातीच्या काळात उद्योगशील राहावे, आळस टाळावा.

साडेसाती सुरू असताना (व नसतानाही) श्री क्षेत्र शनिशिंगणापूर येथे अधूनमधून जाऊन शनिमहाराजांचे प्रार्थनापूर्वक दर्शन घेऊन यावे. अनवधानाने झालेल्या अपराधांची क्षमा मागावी.

- सचिन मधुकर परांजपे (पालघर)

(या लेखाचा पूर्वार्ध वाचण्यासाठी येथे क्लिक करा.)